context da la pagina
La ISDU fixescha ses temas principals per ils emprims trais onns
La ISDU ha in mandat general per la protecziun e la promoziun dals dretgs umans en Svizra. Cun quai che ses meds èn fitg limitads, sto la ISDU fixar da maniera intenziunada accents tematics per sia activitad.
En il rom d’in process strategic e sin basa da las recumandaziuns dal Mapping dals dretgs umans surdà sco incumbensa il 2023, han ins identifitgà quatter accents tematics per il temp da circa trais onns (2025-2027):
Dretgs umans e democrazia
Dretgs umans e federalissem
L’externalisaziun da la responsabladad per ils dretgs umans
Discriminaziun multipla
Ulteriurs detagls davart ils accents tematics
Tar tut ils quatter accents sa tracti da temas interdisciplinars. Els na pertutgan pia betg in dretg uman determinà, ina convenziun determinada u ina gruppa dad umans determinada. Els avran plitost il spazi per dumondas che pertutgan da principi tut ils secturs dals dretgs umans.
Quai è oravant tut relevant durant ils emprims onns da l'existenza da la ISDU. D'ina vart sa chatta la valur speziala d'ina instituziun naziunala per ils dretgs umans essenzialmain en la dimensiun da ses mandat. Da quai resulta la pussaivladad da colliar differents temas e da s'acquistar ordlonder novas enconuschientschas. Da l'autra vart èn temas interdisciplinars era il pli adattads per pudair sviluppar in effect cumplessiv per promover e per proteger ils dretgs umans.
Ils accents tematics n’excludan betg autras tematicas
Che la ISDU fixescha accents tematics na vul dentant betg dir ch'ella lavura exclusivamain davart quests temas. I vala da princip; la ISDU po daventar activa en tut las tematicas dals dretgs umans, nua ch'i la para d'esser raschunaivel e necessari. Daventar activ ordaifer ils accents tematics è spezialmain raschunaivel là, nua che dretgs umans èn periclitads directamain.
Novas plazzas
Suenter ch'ils temas èn definids ussa, cumenza la ISDU ad installar in team per sia perscrutaziun e cussegliaziun. Per quai tschertga el dus collavuratur:as en la perscrutaziun e la cussegliaziun cun in'expertisa che correspunda als emprims accents tematics da la ISDU. Annunzias vegnan acceptadas fin ils 29 da settember.