Dapi ils 27 da mars 2025 ha la pagina d'internet da la ISDU pia in segund pendant ch'ins po cuntanscher sur la trav violetta Portal d'infurmaziun davart ils dretgs umans en Svizra, sisum a dretga da la pagina da la ISDU. La part instituziunala da la pagina d'internet (trav verda  "Instituziun svizra per ils dretgs umans") – nua che Vus essas actualmain – è deditgada vinavant a las infurmaziuns davart il mandat e davart las activitads da la ISDU.

Tge è da chattar sin il portal d’infurmaziun?

Il portal d'infurmaziun duai esser in lieu da la savida democratica, nua che tant expertas ed experts sco er persunas betg expertas chattan respostas a lur dumondas davart la situaziun dals dretgs umans en Svizra. Il portal stat a disposiziun per tudestg e per franzos.

Las paginas Ils dretgs umans en in'egliada porschan ina survista cumplessiva da contracts e d'instituziuns internaziunalas per ils dretgs umans. Ellas defineschan er tut ils dretgs umans che vegnan protegids sin plaun internaziunal. La pagina Ils dretgs umans en Svizra explitgescha la protecziun dals dretgs umans tras il sistem federal e tras la Constituziun.

Las paginas tematicas explitgeschan en paucs pleds da tge ch'i sa tracta en Svizra tar temas impurtants davart ils dretgs umans: dretgs socials, dretgs da persunas cun impediments, dretgs d'uffants e.u.v. Mintga tema vegn accumpagnà d'ina glista cumpletta dals texts, da las instituziuns e da la giurisdicziun, relevants en chaussa.

Las paginas Proceduras da rapport da las Naziuns Unidas e Proceduras da rapport dal Cussegl da l'Europa preschentan tut las proceduras internaziunalas ed europeicas, a las qualas la Svizra è participada. Mintga procedura vegn descritta detagliadamain e per l'emprima giada èn las recumandaziuns adressadas a la Svizra resumadas en in lieu. Las partidas participadas a las proceduras, tant las autoritads sco er la societad civila, chattan tut las datas impurtantas dals ciclus da rapport.

Il resultat d'ina collavuraziun

Avant la fundaziun da la ISDU il  2023 aveva l'organisaziun nunguvernamentala humanrights.ch gestiunà durant blers onns in portal d'infurmaziun sumegliant ed ademplì uschia ina incumbensa d'infurmaziun impurtanta. Il portal ch'è oz vegnì mess online sa basa fitg ferm sin la lavur ch'è vegnida prestada avant l'onn 2023 ed è vegnì concepì en stretga collavuraziun cun humanrights.ch. La ISDU engrazia cordialmain per quel agid.

Nus As giavischain bun divertiment cun navigar!