Tgi metta en la pratica ils dretgs umans en Svizra?

Per la Svizra èn ils dretgs fundamentals ed ils dretgs umans fixads en la Constituziun ed en cunvegnas internaziunalas dals dretgs umans. Lur realisaziun è l’incumbensa da la Confederaziun e dals chantuns. En correspundenza al sistem federal èn las pussaivladads per soluziuns fitg variadas ed il stadi da la realisaziun è different. Sco tut ils stadis sto la Svizra preschentar regularmain rapports davart la realisaziun da las cunvegnas internaziunalas dals dretgs umans a la ONU ed al Cussegl d’Europa. Questa furma da rapportar è pli cumplexa pervi dal sistem federal.

Infurmaziuns actualas per la ISDU

La ISDU vegn a sustegnair las autoritads tar la realisaziun da lur obligaziuns en connex cun ils dretgs umans e contribuescha uschia a la protecziun ed a la promoziun dals dretgs umans en Svizra. Ultra da quai vegn ella a far valair novs accents en la debatta publica e contribuir a l’infurmaziun da circuls interessads e da la vasta publicitad.

Per pudair metter ses accents da maniera adequata dovra la ISDU d’ina vart ina vista generala davart il stadi da realisaziun da las obligaziuns en connex cun ils dretgs umans en la Confederaziun ed en ils chantuns. Da l’autra vart sto ella sa procurar ina survista davart las structuras ed ils process en las proceduras da rapportar dals stadis a la ONU ed al Cussegl d’Europa e davart la realisaziun politica da las recumandaziuns a la Svizra. Ella ha surdà in’incumbensa correspundenta per in studi a la «Interface Politikstudien Forschung Beratung SA».        

La realisaziun dals dretgs umans en Svizra è en ils mauns da different(a)s responsabels(las) da la politica e da differents posts d’administraziun. Quai chaschuna ina gronda variaziun da propostas da soluziuns, da success e da deficits. La «Interface» vegn a relevar questa multifaradad en ses studi da basa. Punct da partenza per questa retschertga è la pli nova examinaziun generala regulara (Universal Periodic Review, UPR) da la Svizra tras il  Cussegl dals dretgs umans da la ONU dals 27 da schaner 2023.

Basa da datas vasta

Per tut ils temas elavurads vegn «Interface» a relevar deficits e «Best Practices» – en Svizra, dentant era en cumparegliaziun cun experientschas a l’exteriur. Il studi duai mussar opziuns, cun tge accents da lavur e strategias che la nova SMRI po crear ina plivalur en las proceduras dals rapports statals ed oravant tut tar la realisaziun dals dretgs umans en Svizra, e quai en collavuraziun cun il stadi e cun organisaziuns dals dretgs umans e sco cumplettaziun da quels.

Per questa retschertga vegn «Interface» ad analisar las proceduras actualas dals rapports statals en las qualas la Svizra è involvida, ed era rimnar infurmaziuns, experientschas e giavischs tar las autoritads, la societad civila, l’economia, tar perscrutadras e perscrutaders e tar INDUs dad auters pajais pertutgant la coordinaziun ed il rinforzament da quellas lavurs per ina protecziun cumplessiva dals dretgs umans.

Infurmaziuns davart il project

Num dal project: Lavur da basa per la Instituziun svizra da dretgs umans ISDU
Entschatta dal project: 25 d’october 2023
Fin dal project: avrigl 2024
Incumbensada: Interface Politikstudien Forschung Beratung SA

Ils products da quest process èn avant maun en il fratemp ed ins tschertga pussaivladads raschunaivlas per als render accessiblas a la publicitad en ina furma utilisabla.